Того же лѣта Всеславь Брячиславичь Полотцкии рать почалъ: прииде кь Пскову ратию и перси билъ порокы. О знамениихъ. Въ си же времена явися знамение на западѣ, звѣзда превелика, луча имуща кровавы, въсходящи съ вечера по заходѣ солнечнѣмь , и пребысть за 7 днии; се же проявляше не на добро, посемь же быша усобицы многы и нашествие поганыхъ на землю Русскую; сии бо звѣзда бысть акы кровава, проявляющи кровопролитие. чюдо. Того же лѣта въврьжень бысть дѣтищь въ рѣку Сѣтомль, егоже дѣтища вывлекоша рыболове въ неводѣ вь Киевѣ, егоже смотрихомъ весь день до вечера, и пакы въврьгоша его въ воду, бяше бо на лици ему срамнии уди, а иного нелзѣ и сказати срама ради. Предъ сѣмъ же временемъ солнце премѣнися, и не бысть свѣтло, но акы мѣсяць бывъ, егоже невѣгласи глаголють снѣдаему сущу. Сия же бываютъ знамения не на добро; мы бо по сему разумѣемъ , якоже древле въ Иерусалимѣ случися въ царство Антиохово Сириискаго, сына Селевкова, иже Епифании тлькуется корень грѣха, осмыи по Александрѣ Макидонскомъ. Предъ сего Антиоха нахожениемь за 40 днии начать являтися въ Иерусалимѣ внезаапу на въздусѣ на конихъ рыщущимъ, въ оружии, златы имуща одежда, и полкы обоамы являются , оружиемь движащимся; се же проявляаше нахожение Антиохово и нашествие рати. Посемь же при Неронѣ, въ томъ же Иерусалимѣ, восиа звѣзда копеинымъ образомъ; се же имяше нахождение рати отъ римлянь. И пакы бысть при Устынианѣ цари, въ Цариградѣ, звѣзда восиа на западѣ, луча испущающа, юже прозывааху блисталницу, и бысть блистающу 20 днии, посемь же бысть звѣздамъ течение съ вечера до утра, и мнѣти всѣмъ, яко звѣзды падаютъ, и пакы солнце безъ лучь сиаше; посемь бо крамолы человѣкомъ и умертвиа бяше. Паки же при Маврикии цари бысть сице: жена дѣтищь роди безъ очию и безъ рукь, въ чреслѣхъ ему бѣ рыбеи хвостъ приросль; и песь родися о шти ногъ. Въ Африкии же родистася два дѣтища, единъ о четырехь ногахъ, а другыи о дву головахъ. Посемь же бысть при Константинѣ Копронимѣ, иконоборцѣ, сынѣ Лва Исавриискаго, течение звѣздно бысть на небесѣхь, отторгаху бо ся на землю, яко видящимъ имъ мнѣти кончину сущу; тогда же и въздухъ възлияся повелику; въ Сирии же бысть трусъ великь, земли разсѣдшися треи поприщь, изыде дивно изъ земли мъска, человѣческымъ гласомъ вѣщающи, проповѣдающи нашествие языкь, еже и бысть: наидоша бо срачины на землю Паластинскую. Знамениа бо на небеси, или възвѣздахъ, или въ солнци, или птицами, или инымъ нѣкоимъ не на добро бываетъ; но сиа знаменiя бываютъ на зло, или проявление рати, или гладъ, или смерть проявляютъ.